mars

  Já já alltaf erum við jafndugleg að skrifa í dagbókina.... Embla Guðrún er orðin 18 mánaða. Hún er komin með 11 tennur & farin að tala í 2ja orða setningum & syngur eins & hún fái borgað fyrir það. Ótrúlega dugleg stelpa. Hún er algjör orkubolti en tekur því miður ALLAR pestar. Búin að vera mikið lasin greyið en ekkert alvarlegt. Nokkrar eyrnabólgur, RS-vírus (lungnabólga) & svo einhverjar hitapestar & magapest. En hún fór í röraðgerð & nefkirtlatöku fyrir rúmum mánuði síðan. Vonum að hún skáni eitthvað á því. Er nú búin að fá tvisvar í eyrun frá aðgerðinni. En við vonum að Embla Guðrún hrissti þetta bara af sér núna með hækkandi sól. Enda þetta komið ágætt.

Daníel Örn er búinn að vera hress & kátur. Hann er orðinn ótrúlega stilltur & duglegur í leikskólanum & heima. Eins & hann segir þá er hann stilltasti strákurinn á deildinni, passar sig vel & er duglegur við að segja okkur frá þegar aðrir haga sér ekki vel ;0) Daníel Örn er duglegur við að fara í heimsókn til Jóhanns Péturs & Emils vina sinna & þeir að koma í heimsókn til hans. En annars er hann ekki enn búinn að kynnast neinum í hverfinu, enda erum við lengi í leikskólanum.

Gleðilegt ár góðu vinir!

Jæja nú gerir mamman þriðju ef ekki fjórðu tilraunina á að skrifa um það sem undan hefur gengið síðustu mánuði. Hún hefur a.m.k. vit á að gera þetta í wordinu núna & afrita yfir á Barnalandið, þannig að það þurrkist ekki út allt sem hún hefur skrifað!

Mamman byrjaði að vinna á leikskólanum Baugi í ágúst & byrjaði Embla Guðrún í leikskólanum nokkrum dögum síðar. Pabbinn tók aðlögunina & gekk hún ótrúlega vel. Embla Guðrún unir sér vel í leikskólanum & er algjört “leikskólabarn”. Elskar að vera að leika með krökkunum. Hún byrjaði að ganga í byrjun október en þá var hún búin að ganga á hnjánum, eins & Ragnar Reykháls í nokkrar vikur. Mamman var mjög fegin þegar daman fór að ganga þar sem hún var orðin ansi fljót að slíta upp sokkabuxunum sínum & komin með sigg á hnén ;0)

   13.september átti Embla Guðrún afmælið & héldum við upp á það með prompi & prakt í nýju íbúðinni okkar. En við fluttum í byrjun september yfir í Breiðholtið & líkar mjög vel hérna í Seljunum. Róleg & góð gata, góður garður & móinn hér rétt fyrir aftan okkur. Fullt af leikvöllum, þannig að það verður nóg um að vera þegar byrjar að vora. Krakkarnir eru enn í leikskólanum okkar í Kópavogi enda stutt í að Daníel Örn byrji í skóla. Tók því ekki að vera að aðlaga hann að nýjum leikskóla áður en skólagangan hefst. Óþarfa rót að mati foreldranna. Vonum að hann fari að hitta krakka hér í hverfinu með sumrinu sem hann vingast við. Það er reyndar stelpa í húsinu hliðina á okkur sem er hálfu ári yngri en hann, 2006 módel. Erum aðeins búin að heilsa upp á hana en eigum enn eftir að banka upp á & biðja hana um að leika. Á meðan fær Daníel Örn að fara heim með Emil, Jóhanni Pétri & Viktori eftir leikskóla annars lagið & þeir að koma hingað. Annars er Daníel Örn ánægður hér í Breiðholtinu & sáttastur við að nú er hægt að hafa rennibraut á rúminu sínu & Embla Guðrún fékk sér herbergi.

   Embla Guðrún er farin að spjalla á fullu & síðasta mánuðinn hefur hún tekið þvílíkt þroskastökk. Skilur mjög mikið af því sem maður segir & biður hana um & svo er eins & hún hafi gleypt orðabók. Fyrstu orðin hennar voru: mamma, pabba, ava, amma, bæ, hæ, kanína (uppáhalds bangsinn sem hún skilur ekki við sig) & banana (allir ávextir). En eins & ég segi er hún farin að tala meira núna & byrjaði hún að syngja rétt fyrir jólin. Krúttlegast í heimi.

   Á jólunum vorum við í Birkihvammi ásamt ömmu & afa, Svanhvíti & Einari & fjölskyldu. Það var voða notalegt nema fyrir þær sakir að Embla Guðrún fékk hita klukkan 4 & var voða slöpp í matnum & vildi bara sitja hjá mömmu sinni. En hún hresstist þegar verið var að opna pakkana enda stíllinn þá farinn að virka. Krakkarnir voru ótrúlega ánægð með gjafirnar sínar en Embla Guðrún auðvitað ekki alveg að fatta þetta. Daníel Örn fékk m.a. bækur, dvd disk, fjarstýrðan trukk, dikital myndavél (frá okkur foreldrunum), hermenn, föt, pet shop, & lego. Embla Guðrún fékk föt, handsmíðaðan vagn & dúkku, bækur, talandi bangsa (frá okkur foreldrunum), þroskaleikföng o.fl. Takk fyrir okkur!

   Þetta eru helstu fréttirnar af okkur hér í Breiðholtinu. Foreldrarnir fóru jú til Boston í 5 daga & voru krakkarnir í Birkihvammi hjá ömmu & afa á meðan. Gekk eins & í sögu fyrir utan að Embla Guðrún fékk í eyrun. Hún fékk svo aftur í eyrun nokkrum vikum síðar þannig að nú eigum við pantaðan tíma hjá Einari Toroddsen & ætlum við að athuga hvort ekki þurfi að taka nefkirtlana & setja rör, svona miðað við fjölskyldusögu. Soffíu barnalækni finnst það líklegt.

En látum þetta nægja af fréttum af okkur í bili. Yfir & út!

Júlí: Hringferð, spítalainnlögn, útilegur & leikskólaaðlögun

Þið segið það já. Ansi langt frá síðustu færslu. Við erum búin að gera slatta í sumar. Fórum hringinn með afa Sigga & ömmu Áslaugu. Við byrjuðum á Akureyri þar sem við vorum í 2 nætur í rigningu (ekki sérlega skemmtilegt með Emblu Guðrúnu skríðandi) & fórum svo í Atlavík. Erla, Auðunn & Amanda Sól ásamt Gauji & börnin hans, Birkir & Erna hittu okkur svo þar. Fyrsta tönnin hennar Emblu fannst einmitt þar. Við vorum í Atlavík í ágætis veðri í 3 nætur áður en við ætluðum að halda áfram í Skaftafell. Þar var veðrið svo leiðinlegt að við héldum bara áfram í Þakgil (frekar langur ferðardagur þar á ferð & Embla að taka aðra tönn. Ekki góð samsetning fyrir pirraða tönnslustelpu!) Þakgil klikkaði ekki frekar en fyrri daginn. Við fengum æðislegt veður. Sól & hita í 2 daga sem við gistum en amma Áslaug & afi Siggi fóru heim degi á undan okkur. Tönn nr 2 kom stuttu síðar í ljós hjá Emblu Guðrúnu.

Mamman & pabbinn fóru í brúðkaup & þá sváfu systkinin í fyrsta skiptið (þ.e.a.s. Embla Guðrún) hjá afa Sigga & ömmu Áslaugu. Það gekk ótrúlega vel. Enda ekki við neinu öðru að búast ;0)

Við fórum í dagsferð um suðurlandið einn föstudaginn þar sem við kíktum í Slakka & í sund í Reykholtslaug í frábæru veðri. Við vorum svo á pallinum í Birkihvammi í brakandi blíðu heila helgi þar sem Daníel Örn fór varla upp úr pottinum.

Eftir pottahelgina miklu var Daníel Örn aðeins með í eyrunum (vökva en engan hita) þannig að við fórum upp á Dómus Medica að fá a.m.k. eyrnadropa. Þar var hann aðeins skoðaður, fékk eyrnadropa en engin sýklalyf enda ekki með neinn hita & hress þrátt fyrir smá vökva. Um kvöldið var drengurinn svo kominn með 39 stiga hita & var enn svo lasinn daginn eftir þegar mamman hringdi í Einar eyrnalækni & fékk að mæta með Daníel Örn rétt eftir hádegi. Einar rétt skoðaði hann & spurði mömmuna hvort Daníel Örn hefði alltaf verið með svo útstæð eyru. Mamman hafði ekkert tekið eftir því en sá nú hvað hægra (eyrnabólgu eyrað) væri ekki eins & það átti að vera. Við vorum því send beint upp á Barnaspítala Hringsins til að útiloka að sýkingin hefði farið aftan í beinið. Mamman var þarna með Emblu Guðrúnu grútsyfjaða (enda bara búin að sofa í klukkustund) & Daníel Örn virkilega slappan (sofnaði á biðstofunni hjá Einari) & brunaði því upp á Sjúkrahús að kíkja á strákinn sinn. Pabbinn kom svo aðeins síðar upp á sjúkrahús. Þegar átti að taka blóðsýni reyndu læknarnir 2 sinnum að setja nál í handarbakið á meðan foreldrarnir þurftu að halda Daníel Erni niðri hann fann svo til út af nálinni. Loksins tókst að setja upp nálina í olnbogabótina. Pabbinn fór því næst með Emblu Guðrúnu í Birkihvamm þar sem amman & afinn pössuðu hana á meðan beðið var eftir næsta skrefi með Daníel Örn. Hann var svo lagður inn til að fá sýklalyf í æð. Við fengum samt að fara smá heim á milli áður en hann lagðist inn. Daníel Örn vildi samt helst ekkert vera að fara enda fullt af flottu dóti & dvd diskum upp á spítala ;0) Pabbinn tók fyrri nóttina upp á spítala en mamman gisti í Birkihvammi með Emblu Guðrúnu en þá gat hún verið frameftir upp á spítala á meðan Embla svaf vært í Birkihvammi. Daníel Örn svaf illa þessa nótt, vaknaði þegar hann fékk lyfið um eitt leytið, var mikið þyrstur, heitt & svo klukkan 5 var hann alveg vaknaður & fékk að horfa á dvd (með heyrntól á öðru eyranu til að vekja ekki herbergisfélagann). Mamman var svo mætt fyrir níu en Embla Guðrún fékk að vera með ömmu & afa á meðan. Lyfin voru strax farin að virka & hitinn aðeins farinn að lækka. Hann fékk að fara á leikdeildina & skemmti sér ekkert smá vel. Embla Guðrún kom svo til okkar á hádegi & var fram á kvöld þegar þau pabbinn fóru heim en mamman gisti upp á spítala. Daníel Örn leið mun betur & eyrað var ekki alveg jafn viðkvæmt & rautt. Nóttin gekk vel & svaf hann eins & steinn, meira að segja þegar hann fékk lyfið sitt um nóttina. Hann var orðinn hitalaus morguninn eftir. Við fengum þá að fara upp á Borgaspítala á Háls, nef –og eyrnadeild þar sem hann var skoðaður, ryksugað úr eyranu & skrifað upp á sýklamixtúru & sterka eyrnadropa. Þá máttum við fara heim en þurftum samt að kíkja upp á Barnaspítala um kvöldið í síðustu sýklalyfsgjöfina. Daginn eftir (á föstudeginum) var aftur mætt á Borgarspítalann til að skoða eyrað & ryksuga, aftur á laugardeginum & svo á sunnudagsmorgunninn var hann skoðaður & þá var hann orðinn alveg góður & búinn að vera hitalaus í 3 daga. Við kíktum aðeins í Nauthólsvíkina eftir lækninn en vorum ekki lengi þar sem við ákváðum að fara heim að pakka niður í töskur til að halda í útilegu.

Við vorum komin upp á Bakkaflöt hálf átta um kvöldið en þar voru Einar, María, Nökkvi & Brynja Dögg búin að vera í 2 nætur. Svanhvít & Siggi komu stuttu síðar með Mola sinn. Við gistum í 2 nætur & fórum næst í Vaglaskóg en Svanhvít & Siggi héldu heim á leið með Mola enda S&S á leið til Eyja. Við vorum í 4 nætur í góðu veðri í Vaglaskógi & nutum þess að vera í til. Við  kíktum í dagsferð í Ásbyrgi & Hljóðakletta, skoðuðum bílasafn & fórum í bæjarrölt á Akureyri. Ótrúlega skemmtileg ferð. Við keyrðum heim á laugardagskvöldið & vorum komin heim rúmlega eitt um nóttina. Nú var kominn tími til að laga svefnvenjur hjá grislingunum enda leikskólinn alveg að byrja & fæðingarorlofi að ljúka hjá mömmunni.

Fátt er í leikskólanum en Daníel Örn er sáttur enda gaman að hafa leikfélaga (búinn að leiðast frá laugardegi þegar við yfirgáfum Nökkva). Embla er í aðlögun með pabba sínum en það gengur ótrúlega vel. Verið er að prófa 3 daga aðlögun þar sem þau feðgin eru frá 9-15. Rannsóknir sýna að börn eru fljótari að aðlagast með þessari aðferð. Á morgun er svo síðasti aðlögunardagurinn & svo byrjar allt fyrir alvöru á mánudaginn. Enginn pabbi þar á ferð. Reyndar er planið að mamman fái aðeins að vera á staðnum enda daman þá búin að vera í helgarfríi. Sjáum svo hvernig fer.

Svíaheimsókn, 17.júní & fleira

Við fengum Sigurlaugu, Ellu Maríu & Önnu (systur hennar ömmu Áslaugar) frænkur okkar í heimsókn í rúma viku, en þær búa í Svíþjóð. Þær gistu í Birkihvammi en mamman & Embla Guðrún voru duglegar að kíkja þangað á daginn & Daníel Örn nokkrum sinnum eftir leikskóla. Við gerðum margt skemmtilegt eins & skrúðgöngu á 17.júní, fórum saman í pottinn í Birkihvammi, í Fjölskyldu-& húsdýragarðinn & auðvitað í verslunarleiðangur líka. Reyndar telst það síðasta ekki til skemmtunar hjá börnum en það er annað mál. Við eigum eftir að sakna þeirra mikið því það var svo gaman að vera með þeim. Daníel Örn var voða krútt & kallaði Ellu Maríu á tímabili "þriggja ára stelpuna". Bara krúttlegt. Fannst hún líka tala svolítið skrítið (enda að blanda saman sænsku & íslensku) en það gerði ekkert til & þau gátu leikið sér saman þrátt fyrir það.

Embla Guðrún er farin að skríða mun meira á fjórum fótum en hún byrjaði á því um helgina. Hún skríður samt mest eins & stríðsmaður en fer alltaf meira & meira upp á fjórar. Hún byrjaði líka að sýna okkur á fullu hvað hún er stór um helgina & í gær byrjaði hún að vinka. Nóg að gera hjá dömunni. Hún stendur líka reglulega upp þegar hún hefur eitthvað að halda í.

Daníel Örn byrjar svo í langþráðu fríi á föstudaginn. Það verður sko gaman hjá okkur í sumarfríinu & við ætlum að vera rosalega dugleg að taka myndir :)

Bless í bili

Ganga, bæjarferð, veikindi & fleira

Mamman & Daníel Örn löbbuðu með Emblu Guðrúnu í vagninum frá Kórunum í Birkihvamminn (5-6 km) daginn sem afi & amma komum heim frá Spáni. Erum ótrúlega stolt af því en Daníel Örn kvartaði ekkert á leiðinni :0) Það var gott að sjá afa & ömmu eftir allan þennan tíma (3 vikur) & var Embla Guðrún ánægðust að sjá afa sinn, enda algjör afastelpa! Við fengum svo fullan poka af fötum sem voru auðvitað flest úr H&M ;0)

Á laugardaginn var gisti Daníel Örn hjá Kristófer frænda sínum & skemmti sér ótrúlega vel. Embla Guðrún fór í fyrstu næturpössunina sína & var svo heppin að fá Erlu Margréti frænku, Auðunn & Amöndu Sól (5 ára) til að passa sig. Stelpan var víst eins & engill enda hjá svo yndislegu fólki sem hugsaði svo vel um hana. Hún vaknaði reyndar klukkan 5:30 á sunnudeginum en þá fór Erla bara að leika við hana & lagði sig svo bara aftur þegar Embla Guðrún fór út í vagn. Takk æðislega fyrir pössunina!

Embla Guðrún stóð upp í fyrsta skiptið síðasta sunnudag. Það er voða fyndið þegar hún stendur við eitthvað að sjá hvað hún er stot en veit í raun ekki hvað hún á svo að gera... Hún er nú búin að vera lasin síðan á mánudag. Þá rauk hún í 39 stiga hita & var eins á þriðjudegi en á miðvikudag lækkaði hitinn aðeins en með þessu er hún búin að vera illt í maganum & með niðurgang & í dag var hún loksins orðin hitalaus & ekkert skot komið. Það var hræðilegt að sjá hana vera svona illt í maganum & ónóg sjálfri sér. Stelpan sem er alltaf brosandi brosti nær ekkert fyrr en í dag & vildi bara vera í mömmufangi. Við fórum til læknis í gær sem sagði þetta vera þarmasýkingu sem varir í ca 2-4 vikur. Skemmtilegt, fynnst ykkur ekki? Mamman var svo komin með í magann í nótt. Vonandi ekki það sama & Embla Guðrún!

Daníel Örn er kominn með svolítinn leikskólaleiða en það fer að styttast í sumarfríið. Hann fór í skemmtilega bæjarferð með leikskólanum á miðvikudag þar sem þau tóku strætó niður í bæ. Þar skoðuð þau Hallgrímskirkju & fóru upp í turn, skoðuð styttur & fóru í Hljómskólagarðinn. Skemmtilegur dagur.

Daníel Örn & pabbinn fóru í útskriftaveislu til Bigga frænda & Ingibjargar frænku sem bæði útskrifuðust úr HÍ í gær. TIl hamingju með það!!! Mamman & Embla Guðrún voru heima þvi Embla var eins & áður segir lasin. Berglind frænka útskrifaðist líka & viljum við líka óska henni til hamingju!

Á miðvikudaginn koma Sigurlaug frænka, Ella María stelpan hennar & Anna Fía (systir mömmu). Það verður ótrúlega gaman að hitta þær enda langt síðan þær komu til okkar síðast. Þær búa nefnilega í Svíþjóð. Við munum bralla eitthvað skemmtilegt saman. Svo bíðum við bara eftir júlímánuði þegar pabbi verður búinn í sumarskólanum því þá er planað að fara í útilegur. Getum varla beðið! Það verður sko gaman!

En ætli þetta sé ekki komið ágætt núna af fréttum af okkur hér í Kórunum. Heyrumst síðar.

Sveitaferðin í Bjarteyjarsandi

Á miðvikudag fórum við í skínandi góðu veðri í Bjarteyjarsand í Hvalfirði með leikskólanum. Við keyrðum á eftir rútunni þar sem Embla Guðrún átt eftir að sofa seinni lúrinn sinn & við með kerruna hennar & fleira. Daníel Örn svaf reyndar líka alla leiðina. Við byrjuðum á að fara í fjöruna að leika. Við fengum okkur aðeins að borða & mamma skipti á Emblu Guðrúnu í framsætinu áður en við kíktum á dýrin. Því miður vildi svo til að mamma hafði óvart ýtt á læsa takkann á lyklunum & sett í sætið en ekki í buxnavasann... Pabbinn & Daníel Örn sátu í skottinu & pabbinn lokaði því & spurði um lyklana í leiðinni... Úps! Þeir voru læstir inni í framsætinu!!! SKiptitaskan, húslyklar & veski inn í bíl. Foreldrarnir reyndu að halda ró sinni á meðan Daníel Örn skoðaði dýrin & svo fórum við heim með rútunni. Þá var bara að redda lyklum af ömmu & afa húsi til að komast í auka lyklana af okkar íbúð. Siggi var á æfingu, Svanhvít á fundi & Einar frændi símalaus í skólanum! Við náðum í Maríu & fengum að fara inn til þeirra, fá lánaða bleiu á Emblu Guðrúnu & bílinn til að komast til langömmu að fá lykla. Við fundum sem betur fer auka lyklana & gátum farið heim & sótt auka lyklana af bílnum. Pabbinn þurfti því að fara alla leiðina í Hvalfjörð (klukkutíma akstur) & sækja bílinn en Biggi frændi var svo góður að fara með pabba. Þetta var því svakalegur dagur & foreldrarnir ansi þreyttir eftir hann. Það má þó hlæja af þessu núna & vera fegin að ekki þurfti að brjóta upp læsingu eða rúðu til að komast inn í bílinn ;0) Maður lærir líka af þessu að eiga vara lykla á fleiri en einum stað (því hann gæti klikkað)...

Sumar & sól

Það er ekki hægt að segja annað en að það sé komið sumar! Búið að vera æðislegt veður síðustu daga & það spáir flottu veður áfram út vikuna. Ekki leiðinlegt!

Embla Guðrún fór í 8 mánaða skoðun 17.mái, á afmælisdaginn hans Daníels Arnar. Hún er orðin 8.525 kg & mældist 70,5 cm, höfuðmál 44 cm. Hún er ekki alveg að halda sér í kúrvunni hvað þyngd varðar en það er kannski ekki skrýtið miðað við að hún er farin að hreyfa sig svo mikið. Í raun er hún eins & Daníel Örn sem fór líka að léttast á þessu tímabili. Sprautan fór ágætlega í hana, enginn hiti en smá pirringur.

Daníel Örn fékk upphækkun á rúmið sitt & tjöld til að setja á rúmið í afmælisgjöf & líka nokkra Playmokalla frá okkur foreldrunum & Spiderman sólgleraugu frá Emblu Guðrúnu (sem koma vel að notum þessa dagana). Nú sefur Daníel Örn eins & í koju & getur leikið sér undir rúminu. Það fylgdi líka rennibraut en herbergið hans Daníels er ekki alveg nógu stórt fyrir rennibrautina. ´Daníel Örn bíður því spenntur yfir því að skipta um herbergi við foreldra sína ;0) & vera þá með Emblu Guðrúnu í herbergi. Eftir leikskólann komu María, Nökkvi, Brynja Dögg & Þóra Silla í smá afmælisköku.

Hvítasunnuhelgin var flott hjá okkur. Eins & áður sagði er búið að vera flott veður. Á laugardaginn löbbuðum við yfir til Einars frænda & Maríu en pabbi var að hjálpa Einari með skjólgirðinguna sína, þ.e. að sækja efni & fara með mold. Embla Guðrún svaf á meðan & Daníel Örn fór yfir til Emils Andra, vinar síns, sem býr rétt Einari & Maríu. Mamma & María gátu þá spjallað. Á sunnudaginn kíktum við í sumarbúðstað til Erlu & Bigga frænda & auðvitað Guðmund Bjarka (5 mánaða) sem svaf mest af tímanum sem við vorum þarna. Við lékum á lóðinni, fórum í stutta göngu & kíktum í pottinn. Næst var haldið í afmli til Elisu Margrétar sem er orðin 1 árs. Þær Embla Guðrún verða saman á deild á Baugi :0) Þar var leikið & borðaðar kökur. Í gær var veðrið enn æðislegt þannig að við skelltum okkur í Nauthólsvíkina að hjóla (þ.e.a.s. Daníel Örn hjólaði & foreldrarnir gengu með Emblu Guðrúnu í kerru), borðuðum nesti & settums í smá stund á ströndina áður en við kíktum til læknis með Emblu Guðrúnu (en hún er búin að vera kvefuð í 3 vikur). Hún fékk sýklalyf & batnar vonandi fljótt. Hún er búin að sofa upp í hjá mömmu & pabba síðustu 2 nætur þar sem hún hóstar svo mikið. Sefur á stórum kodda til að minnka hóstann. Við fórum því næst í Birkihvamm en Embla Guðrún svaf seinni lúrin sinn á meðan mamman & Daníel Örn kíktu í pottinn. Pabbin þreif bílinn á meðan :0)

Jæja, þetta er að verða ágæt færsla hérna hjá okkur. En fleiri fréttir, Embla Guðrún hætti á brjósti fyrir 3 dögum en hún var farin að fá bara eina gjöf fyrir svefninn & ekki var hún nú að fá mikið litla skinnið... Þetta var bara ekkert mál! Alveg sátt við að fá bara pela með stoðmjólk & fullt af knúsi á meðan ;0)

Daman er núna sofandi úti í vagni & Daníel Örn er í leikskólanum. Það er svo sem ekkert planað í dag en á morgun förum við í Kjós með Daníel Erni & leikskólanum. Þar ætlum við að kíkja á dýrin & hafa gaman. Ætlum við njótum svo ekki bara góða veðursins það sem eftir er af vikunni & reynum að sækja okkur smá lit í kinnarnar & freknur á nefið ;0)

Yfir & út!